kikiting最愛Alpaca - 旅遊逸事

2018/05/26

2018年5月海洋贊禮號越南峴港/芽莊 6日5晚遊輪之旅 (自遊行) 真美碼頭落船篇

上船前最令我擔心既係郵輪泊岸個2日既安排。如果唔跟團落船會點? 我地2人再加父母親戚共6人，只想到越南走走，名勝古蹟老人家無乜興趣，只想到當地食地道美食、嘆下咖啡、買少少手信就可以。船上提供的岸上觀光團平均都要60-75美元一位，我地認為趕鴨仔都咁貴，去既地方父母又無乜興趣，當然想自遊行，到最近的城市即可。

第3日一早，海洋贊禮號終於到達峴港/真美Chan May Port! OMG! 呢個地方唔會想再去。碼頭位置非常偏僻，整個碼頭就只有幾家手信店、郵輪及旅行社預約左既旅遊巴，仲有就係貴到無朋友既的士集團!

注意：落船當日都會有早餐供應，餐廳既開放時間會早左，要睇返份Daily Planner今日行程即可。

落船手續好簡單，由於上船時已經交左passport俾船公司，而且所有人都入境越南必須搞越南簽證(USD 6 / person)，係落船前一晚就已經放左張visa (橙色既紙仔) 係你房。只要落船時拎住張visa同埋Seapass房卡，就可以排隊等落船 (船上既人太多，都要等半小時先真正落到船)。過程都幾簡單，因為當地入境人員會係船出口等你，嘟下張Seapass房卡，俾佢印一印就搞掂。

落左船搵的士去市區就係黑暗旅程既開始!!!!

由於第一眼望個碼頭係一遍無人之境，只有大量既旅遊巴，完全無的士既影子，心諗咁大獲!? 問左手信店個女人，出峴港Da Nang，WHAT? 我地6人USD200差不多千六蚊搭的士??? 雖然係包來回同埋可選中途景點者... 以越南物價來講，心中只有「呃遊客錢」!!

咁我地無take offer一路行出D，價錢係會平D ga!! 你一路行一路就有人走過黎問"Taxi?" 一路行一路問由USD 30/ 1位, 再行出D有人可以出USD 25/ 1位! 由於天氣太熱，最後accept左USD 25/ 1位既offer! (期後有同船既人話再行出D只需USD 20/ 1位!!! 蝕哂喇.. ) 以下就係我地搭個架集團式"Taxi"....

個Taxi司機應該係唔識英文(或者係扮唔識)，同佢講乜都係俾同一個答案我地...... 佢只係講"Han.. Han?" 最後我地只好用離線既google map睇住自己去左邊 (最怕俾人賣豬仔..) 結果搭左成個鐘車係去左Han Market 韓市場! 入左轉左個圈咋! 4位老人家話要去廁所俾人收左2萬盾!! 好黑暗好賤!!!!

之後再去我地想去既地方 Herbal Spa! 朋友話越式按摩正過泰式一定要試~ 呢間係網上評價好高~ 老人家無興趣... 同司機講車佢地去Casino~

Herbal Spa Massage真係唔錯! 可以推薦~ 環境舒適乾淨，百幾蚊港紙又有香草球又有熱石!! 如果唔係怕老人家等我諗我會揀90分鐘而唔係60分鐘!! 而且做完massage又有海帶湯飲同番石榴食!! 本來USD 32 兩個人我地諗都無諗就俾夠USD 40! 其實真係好平!!

我地做完massage，本來想去Casino既老人家已經坐哂係門口等... 原來Casino變左supermarket飲咖啡...

唉.. 好彩佢地無乜怨言! 仲話D咖啡好飲~ 再去搵地方食PHO BO!! 本來見到D街邊檔好多人食想叫司機停車，但係司機一聽到PHO就話嗯嗯，就車左我地去一家乜人都無既店.... 司機仲要同餐廳老闆好熟係咁吹水!!! 心諗唔係卦!! 又係劏遊客既黑店?? 老人家話試下囉反正都黎到... PHO既味正常但係D牛肉好硬又無牛味... 店內又熱得一把風扇... 春卷超難食!!! 連我個位乜都食既男人都唔想食!! 最後埋單52萬盾!!! 點左7碗麵，1碟春卷要港幣百八蚊!! 明明越南物價低ga 嗚嗚好傷心! 人地講3萬至5萬盾一碗PHO ga ja! T_T

食完仲有個話係老闆既人走出黎問聽日要唔要book多日車係芽莊接我地，我心諗仲想劏我地，咪傻啦! 聽日落船個度方便過今日十萬倍，我先唔會要你D無冷氣又貴又車人去黑店既連鎖集團!!! 我西住面一口拒絕!

食完我要去BIG C! 我要買手信!!! 我只要買越南即食PHO同埋咖啡粉! 好順利，亦都好似好平咁買到要買既野! 買左1箱VIFON PHO BO牛肉味同1箱VIFON PHO GA雞味。仲有大量Vinacafe既CHAT SUA DA咖啡粉。

仲有少少時間去左對面街買蔗汁飲! 又冰又甜!! 正呀!!! 7,000盾一杯~ 成個人開心返~

2點鐘，要走lu~ 開車返去都要1個鐘! 早D返去希望少D人!

上船都幾快，每個人要check拎上船既野~ 登船立即食少少野，沖身去泳池!! 太熱喇!!

今日認真麻麻! 男人話去左我要去既Spa, 買到我要買既野就算啦~ 我要學下佢EQ咁高! 哈哈

後記，有同船人book左當地既車同導遊，但係黑暗既越南警察唔俾佢地既車入黎碼頭，除非俾錢! 最後搞左好耐先可以入碼頭接人上車!! 浪費左好多時間!!!! 黑黑黑!!!!

峴港，我唔會想再去!!! 所有人眼中只有錢!!! SO POOR!!

2018/05/23

2018年5月海洋贊禮號越南峴港/芽莊 6日5晚遊輪之旅 (自遊行)

出發前做左唔少資料搜集，例如海洋贊禮號係點? 有乜設施? 落船個2日唔跟團可以點自遊行? 等等，可以搵既資料唔算多，搵完仲有好多迷思! 而家我可以同大家分享呢幾日既旅程係點，有乜注意!

第一日上船日：
上網搵資料 -> 上船要早D上，因為佢有供應自助午餐!
當日我地11點係牛頭角站搭巴士5R頭班車。注意最早係11點先有車!!

資料: 九巴5R
路線：穿梭行走郵輪碼頭、牛頭角及觀塘港鐵站
服務時間：星期一至星期五早上11時至下午4時，及
於周六、日及假期，早上11時至晚上7時提供服務。
收費：每程 $6.7
車程：約為30分鐘

等車時已經出現人龍! 個個都一喼二喼，上巴士時都幾麻煩，因為巴士車型係普通款，並不是機場巴士，唯有張D喼放哂係輪椅位! 到觀塘位都難上車喇(d喼)! 所以要自行去遊輪碼頭的話要到牛頭角站搭5R!!!!!!

到左遊輪碼頭11點半，已經有好多旅行團點名/寄行李。我地自遊行既要問職員先知寄行李要行出去有個位先有職員幫我地。

寄完行李上電梯，會去到拎船咭Seapass既位置，我地print左上船證，俾埋passport佢，再對埋信用卡資料(最好上官網填好哂資料就快D)或150美元現金按金就OK!

拎左Seapass就要影張相再過海關，係官網upload過相都要再影，之後既船程/上落船都要認呢張Seapass同張相。

經過一大輪排隊又排隊，12點半終於可以上船喇!!

第一時間當然想去房睇下!!! 但原來房間係1點後先開放!!! 摸門釘就當然要先去搵自助午餐! 自助午餐係船既14樓帆船自助餐廳!!!!! 搭lift上去... OMG!! 好多人排隊!!!!! 12點45分等到1點15分先有得食~ 等半個鐘還好吧!! 食物質素麻麻，比較好有即煮湯麵、自製burger、pizza、salad等等。

食完2點就落房間睇下! 門口已經放左我地既行李，見職員仲分發緊行李! 辛苦哂!!

影完房間相2點25分立馬衝上15樓Seaplex海上多功能運動館!!! 玩碰碰車! 排左一陣幾分鐘，有職員示意已經截左人龍.... 最尾係我地前面個2位外國人! 下? 排左咁耐而家先講又無指示!? 仲要排隊既人唔多，只有一個轉角位，咁快就截人龍好過份!! 我地唯有行下甲板，影下相先。 2點45分左右有D唔份氣咁再去睇下碰碰車條隊! OH WHY? 又俾人排隊玩既?? 我地同職員講我地本來排緊隊，係個2個外國人後面，點解頭先叫我地唔好排隊而家又可以繼續玩....? 好彩最後職員都俾我地玩下一轉!! 如果唔係我一定好憎呢隻船!! 哈哈哈哈

玩完碰碰車覺得玩一次就算! 要排隊就無唯再玩~ 因為車速比較慢，又好快玩完(3分鐘左右)，唔多過癮~

之後係船四圍行，去左15樓船尾Flowrider甲板衝浪，以為有得免費玩... 但呢段時間要上堂先可以玩... 65美金!! 當然我地唔會上啦~ 我地等免費時段先再上黎!! 閃!

4點有個逃生演習，要跟自己個Seapass去返指定區域睇片。

船咭有寫食晚飯時間，講緊既係3樓同4樓既4間免費餐廳 (有人帶位入座)，我地係食5點 (好早呀!)，要5點半前入席。如果你係食自助餐廳的話就唔洗理 (要自己搵位)。其實4間免費餐廳食既野係一樣，只係裝修唔同 (真正既食裝修)。食物質素都係麻麻，但一定食得飽。咁多日比較好D既係魚。

夜晚食完飯去左5樓船尾270度觀景廳睇"光影之旅 (PIXELS)", 再去Music Hall篤波。餓餓地去左4樓24小時免費既Cafe Promenade食左D野~ 再去Royal Theatre睇3D StarWar 8!!! 11點半返房瞓覺!!!!

提提你:

房有張"Daily Planner今日活動"既紙，入面有哂船上所有活動既時間，餐廳及設施既開放時間。你亦可以download Royal IQ睇有乜活動，個人覺得每日都可以睇下，參與下船上既活動，有D都幾好玩~

2016/01/03

食食食－馬鞍山食乜好? Blur Bar Lunch set

Blur Bar開係一個唔多顯眼既地方，位址大概係東華三院黃鳳翎中學對面。跟友人經過數次，中午都有不少人在內用餐，不過未見過要等位。星期日，整個商場既餐廳都要等位... 所以就去Blur Bar一試! 果然，不用等，只有一枱3人。我地㨂左門口sofa位。

店內裝修很有格調，很舒服。

Lunch Set Menu跟是日餐湯和咖啡或茶。價格大約在$62至$85左右，平日不用加一，六、日及假日就要收加一費用。(對不起，忙了拍一下MENU..)

我地㨂左一個蜜糖芥茉豬扒配飯 (另可選意粉或薯菜)和一份煙三文魚香草意粉。店面只有一位男生，點完餐就給我們熱熱的是日餐湯 - 南瓜蓉湯。湯內的油炸鬼(!?) 硬硬的.. 看上去有點怪。湯味道清甜，南瓜味沒有很濃，吃完沒有飽滯感。很快主菜又來了! 星期天不用等很開心~

南瓜湯都幾大碗，但不會有很飽的感覺。

煙三文魚香草意粉，看上去很美觀~

煙三文魚有兩大片，捲成兩朵花花，都是正常味道。

意粉香草味不足，我個人很喜歡Pesto Sauce，這個對我來說不夠好。

意粉內的青椒、紅椒、黃椒和磨菇都很多，感覺很健康，不錯吧。

蜜糖芥茉豬扒配飯 (另可選意粉或薯菜)

蜜糖芥茉汁很配豬扒，也很配飯! 甜甜的減了豬扒的油膩感。

其實.. 豬扒有二大塊!! 只嫌蜜糖芥茉汁太少，多一點會開心多點! :D

餐飲點了熱檸茶跟凍檸茶，冷熱同價~ 檸檬有三大片! 所以酸味很足夠~ 我很喜歡!! (因很多地方都只會有二片薄片而已~~~) 埋單加一後$140。很不錯的選擇!

Blur

地址：馬鞍山新港城中心二期地下23-26號舖

Openrice：http://www.openrice.com/zh/hongkong/restaurant/%E9%A6%AC%E9%9E%8D%E5%B1%B1-blur/440277

2015/12/16

食食食－ Buffet食邊間好? 沙田帝都酒店 1+1吧甜品自助餐

等了2星期，今天終於到我食沙田帝都酒店 1+1吧甜品自助餐!! 要去的話要早至少2星期預訂!!

早上打去帝都酒店 1+1吧 confirm 時間人數，說要3點才有枱，早來未必還到枱。那我跟家人大約2時45分左右到達，還好有枱。一進餐廳，嘩，枱都差不多坐滿了! 甜品桌都圍滿了人! OH! 不會那麼快被吃光光吧!!!!

我們被編到較裏面的枱，挺舒服的，人少反而坐得很舒服。安頓好就出發拎甜品!!!

嘩嘩蛋糕都變這樣了.. 很醜..

還好旁邊有靚靚整齊的蛋糕! 還有名牌~

再旁邊有一杯杯甜品，主要為mousse、啫哩和 creme brulee

網上看小杯上面都有少量水果，不過今天一粒都沒看見...

朱古力慕絲加迷利棉花糖 ♥ ♥／草莓慕絲 ♥／芝麻慕絲 ♥ ♥ ♥／啫哩 ♥ ♥ ♥ ♥／芒果慕絲 ♥ ♥

creme brulee ♥ ♥ ♥ ／草莓酥 ♥ ♥ ♥ ♥

咖啡海綿蛋糕 ♥ ♥ ♥ ♥／抺茶紅豆蓉馬卡龍蛋糕 ♥ ♥ ♥ ♥ ／藍莓芝士蛋糕 ♥ ♥ ♥ ♥

朱古力慕絲蛋糕 ♥ ／抺茶紅豆蓉馬卡龍蛋糕 ♥ ♥ ♥ ♥ ／芝士蛋糕 ♥ ♥／

聖誕朱古力蛋卷 ♥ ♥ ／日本乳酪芝士蛋糕 ♥ ♥ ♥ ♥

自製waffle~ 格仔餅! 正! ♥ ♥ ♥ ♥ ♥

1+1吧大堂，較嘈，地方較窄

左邊為自助水吧，右邊為甜品桌

自助水吧：熱水／冷水／紅茶／咖啡／鮮奶／檸檬

基本上蛋糕會不停refill，不會沒有的!! 唯一會沒有的只有草莓酥／芒果酥!

waffle機，有人在旁幫忙! 不錯! 味道ok!

有煉奶／花生醬／砂糖／提子乾／? ／可自行加到waffle上! 小朋友最開心~

門外poster~

1 + 1 吧

地址：沙田白鶴汀街8號帝都酒店大堂 (地圖顯示)
價錢：$68/位 (未連加一) (星期一至五時間: 14:30~17:30)
價錢：$98/位 (未連加一) (星期六至日及公眾假期時間: 14:30~17:30，可任食Häagen-Dazs雪糕)
位置: 酒店大堂
訂座熱線: 2694 3869

2015/11/13

食食食－馬鞍山食乜好? 馬鞍山糖水店－梨巴王子甜品棧 The Neighbours Dessert House

收工夜麻麻想搵野食，諗起上次見到間梨巴王子甜品店，都幾多人等食，所以係馬鞍山圖書館落車行過去睇睇。

我個人比較喜歡真正既中式糖水 (我指個D真係煲出黎而唔係沖出黎既糖水)，呢間梨巴王子有幾多選擇，因為肚餓，又唔駛等，就試一試。

我同朋友點左芒果紫米露同黑芝麻糊豆腐花。二個都唔錯，食得出係煲唔係開粉。